Православните цркви во Колорадо Спрингс, како и низ целите Соединети Американски Држави, во последните неколку години бележат забележлив и континуиран раст, покажуваат податоци од Православната црква во Америка (OCA). Парохијата „Свето Богојавление“ во Колорадо Спрингс, во периодот од 2022 до 2024 година крстила повеќе од 160 лица, што довело до потреба од изградба на нов храм. Новоизградениот храм „Свети Јован Крстител“ бил осветен во февруари годинава.
Сепак, растот на заедницата не застанал со изградбата на новиот храм. Според свештеникот Андреас Блом, старешина на парохијата „Свето Богојавление“, бројот на верници повторно достигнал ниво при кое храмовите се преполни, а секоја недела десетици луѓе се принудени да стојат надвор за време на богослужбите.
Во текот на 2025 година, двете парохии заедно крстиле или примиле повеќе од 80 нови членови, а во моментот имаат околу 100 катихумени – лица кои се подготвуваат за прием во Православната црква. Нови катихумени се приклучуваат речиси секоја недела, а само по последното собрание, уште осум лица започнале катихуменска подготовка. Новите верници доаѓаат од различни општествени и етнички средини и вклучуваат семејства, самци, млади и повозрасни лица, што, според свештенството, сведочи за поширок духовен интерес кон православната вера во американското општество.
Како дел од петгодишен развоен план, парохијата „Свето Богојавление“ најавила анализа на демографската структура и разгледување можности за купување ново земјиште за понатамошно проширување. Во меѓувреме, новоотворениот храм „Свети Јован Крстител“ планира да основа или да помогне во основање нова православна мисија во поширокиот регион на Колорадо Спрингс, со цел да одговори на сè поголемите духовни потреби на локалното население.
