Патријархот на Српската православна црква, Порфириј, отслужи помен за 16-те загинати при уривањето на настрешницата на железничката станица во Нови Сад, на втората годишнина од трагедијата.
Поменот беше отслужен на 1 ноември, во храмот „Свети Сава“ во Белград, по завршувањето на Светата литургија. На богослужбата присуствуваа епископите Стефан Ремезијански, Алексеј Хвостански и Доситеј Липљански, свештенството на храмот и бројни верници.
Во беседата, Порфириј се осврна на евангелската парабола за богатиот човек и сиромавиот Лазар, посочувајќи дека верата не може да се одвои од љубовта и грижата за ближните, особено за оние што страдаат.
„Се помоливме за упокојување на душите на оние што загинаа под настрешницата што се урна во Нови Сад пред точно две години. Се помоливме за нивните души, знаејќи дека болката е голема“, рече српскиот патријарх.
Осврнувајќи се на околностите на трагедијата, Порфириј порача дека загубата на човечки животи подразбира и одговорност, која не може да се сведе само на општа и заедничка обврска.
„Секој живот е дар од Бога и ние носиме одговорност за него. Во овој случај, сите сме одговорни едни за други, но има и такви што носат поинаков вид одговорност за она што се случи“, изјави тој.
Патријархот повика на сеќавање на загинатите и молитва за нивните души, но и на препознавање на одговорноста на оние што имале поголеми овластувања и должности.
