Православната црква ужива највисоко ниво на доверба меѓу граѓаните на Република Молдавија, покажалерезултатите од најновото истражување на Институтот за маркетинг и анкети, спроведено во периодот од 18 ноември до 4 декември 2025 година. Според анкетата, дури 61 отсто од испитаниците изјавиле дека ѝ веруваат на Црквата, што ја прави најдоверливата институција во земјата.
Молдавија е земја со доминантно православно население – околу 98 отсто од жителите се православни христијани, а црковниот живот е организиран преку структури кои припаѓаат и на Московската и на Романската патријаршија.
На второ место според степенот на доверба се наоѓаат образовните институции, како што се градинките, училиштата и универзитетите, со 53 отсто доверба, додека локалните јавни власти добиле поддршка од 39 отсто од анкетираните. Државните институции бележат значително пониски резултати. Претседателската институција ужива доверба кај 28 отсто од граѓаните, Владата кај 20 отсто, а Парламентот кај само 18 отсто од испитаниците. Особено ниско ниво на доверба е забележано кај медиумите, на кои им веруваат 16 отсто од населението, како и кај правосудниот систем, кој добил доверба од само 12 отсто од анкетираните.
Резултатите од анкетата ја нагласуваат централната улога што Православната црква продолжува да ја има во општествениот и јавниот живот на Молдавија, особено во контекст на опаѓачката доверба во политичките и државните институции.
