Внатрешните тензии во Бугарската православна црква продолжуваат да се продлабочуваат, откако бугарскиот патријарх Даниил му изрече 15-дневна забрана за свештенослужение на архимандритот Никанор, само неколку дена по неговите остри јавни критики кон поглаварот на Црквата. Како одговор на санкцијата, Никанор објави дека има намера да ја напушти Бугарската православна црква, обвинувајќи го патријархот за нарушување на црковниот поредок и за губење на духовниот авторитет.
Софиската света митрополија соопшти дека, по наредба на Бугарскиот патријарх Даниил, против архимандритот е изречена дисциплинска мерка „аргос“ – целосна забрана за свештенослужение во период од 15 дена, почнувајќи од 29 јули.
Според официјалното соопштение, казната е изречена поради однесување кое, според Митрополијата, е неспоиво со свештеничкиот чин и монашките завети за послушност, како и поради постапки што го нарушуваат угледот на Црквата. Од БПЦ наведуваат дека при обид наредбата лично да му биде врачена, Никанор не бил пронајден во манастирот, по што бил известен телефонски. Против него е поведена и црковно-дисциплинска постапка пред Софискиот епархиски црковен суд.
Архимандритот Никанор објави обемна реакција на Фејсбук, во која соопшти дека одбива да се сретне со патријархот Даниил и повторно побара да биде ослободен од Бугарската православна црква со отпусно писмо.
Тој тврди дека уште пред година и пол официјално побарал да ја напушти БПЦ за да ја продолжи својата црковна служба во друга јурисдикција, но дека неговото барање не било прифатено. Во својата објава, Никанор упати остри критики кон патријархот Даниил, наведувајќи дека не го признава неговиот духовен авторитет и дека по својата совест не може да биде негов клирик.
Архимандритот го обвинува патријархот за кршење на Уставот на БПЦ, за дискриминаторски однос кон него и за ставови во врска со војната во Украина кои, според него, не се во согласност со христијанските вредности.
Во својата реакција Никанор предупредува дека нема да признае евентуални нови дисциплински казни доколку наместо отпусно писмо продолжи постапката против него. Тој исто така порачува дека е подготвен да остане во Црногорскиот манастир ако не биде ослободен по црковниот ред и го повикува патријархот Даниил да го потпише отпусното писмо за да се разделат „по живо, по здраво“.
Развојот на настаните претставува уште една епизода од продлабочувањето на внатрешните несогласувања во Бугарската православна црква, кои во изминатиот период сè почесто излегуваат во јавноста.
