Обраќајќи се пред собраните верници на плоштадот „Свети Петар“ во Ватикан, папата Лав XIV се осврна на најновите случувања на Блискиот Исток и во Иран, изразувајќи длабока загриженост за развојот на настаните.
„Со голема загриженост го следам она што се случува на Блискиот Исток и во Иран во овие драматични часови. Стабилноста и мирот не се градат врз меѓусебни закани или врз оружје што шири уништување, болка и смрт, туку единствено преку разумен, искрен и одговорен дијалог“, изјави папата.
Тој упати итен апел до сите вклучени страни да ја преземат својата морална одговорност и да ја запрат спиралата на насилство пред таа да прерасне во неповратна трагедија од огромни размери.
„Нека дипломатијата повторно ја пронајде својата улога и нека се промовира доброто на народите, кои копнеат по мирен соживот заснован врз правда. Да продолжиме да се молиме за мир“, додаде папата Лав XIV.
