Црногорско-приморскиот митрополит на СПЦ, Јоаникиј е еден до ретките, ако не и единствен митрополит од останатите помесни православни цркви, кој откако почна руската инвазија на Украина сослужуваше со Рускиот патријарх Кирил во Москва. Од какво значење за РПЦ е ова сослужување, во време кога речеси сите православни цркви го осудуваат однесувањето на Патријархот Кирил, покажува и тоа што Владимир Путин лично ја сподели оваа вест.
Јоаникј пред два дена беше во Москва, каде прво служеше во Сретенскиот манастир, а потоа и во храмот во Кремаљ. Заедно со Јоаникиј е и парачко-славонскиот епископ на СПЦ, Јован.
-Како што знаете, Српската црква е слична на нашата Црква по култура, духовна определба и по залагањето за единството на православните Словени. Србите никогаш не беа на страна на непријателите на Русија, тоа се историски факти. Ние тоа го цениме, драг Владико! Еве и сега, наоѓајќи се во центарот на Европа, во тешка ситуација сте. Затоа сакам сите ние да го сочуваме своетое единство, посебно единството на Српската и Руската црква, кое се заснова на заедништво на нашиот духовен живот, на заедништвото на нашите светители, и што е најважно, на заедништвото на нашите многу тешки иостории. Нека Бог и натаму го јакне единството на српскиот и рускиот народ, братско единство на нашите цркви, изјавил рускиот Патријарх Кирил по литургијата.
-Ние не можеме многу да помогнеме во овие тешки времиња, но бидете уверени Ваша Светост, драги оци, драги браќа, дека не само ние архиереите и нашето свештенство, туку и целиот српски народ се моли за вас лично и за целината на Свети Рус. Бог по молитвите на Пресвета Богородица и сите светии, а и со нашите молитви да испроси благодат, милост и просветлување на сите кои се најодговорни, да им ги омекне срцата и што поскоро да почне дијалог, да се разговара и по патот на братски дијалог да се дојде до мир, изјавил црногорско-приморскиот митрополит Јоаникј по литургијата.