Во храмот „Св. Кирил и Методиј“ во Гетеборг, Шведска, на 25 октомври беше отслужена архиерејска света Литургија со која чиноначалствуваше митрополитот Европски Пимен.
Во рамките на богослужбата, митрополитот Пимен го произведе Лазе Толески во чин чтец, доверувајќи му го ова црковно послушание во служењето на Црквата.
Централен настан на празничниот ден беше осветувањето на новоизградениот параклис посветен на Покровот на Пресвета Богородица. Со чинот на водоосветување и молитвите на архиерејот, новиот параклис беше посветен за богослужение и молитвен живот на православните верници во Гетеборг.
По повод изградбата на параклисот, Европската епархија им додели благодарници на ктиторите Марјан Матовски и Златко Ковачевски, како признание за нивниот придонес во изградбата на новото молитвено место.
Свеченоста беше збогатена со настап на Играорното друштво „Св. Наум Охридски“ од Малме, кое со своите изведби придонесе за празничното одбележување на настанот.
Осветувањето на параклисот претставува ново место за молитва и собирање на македонските православни верници во Гетеборг, како дел од црковниот живот на Македонската православна црква – Охридска архиепископија во дијаспората.
