Албанската православна црква и Српската православна црква ја потврдија добрата меѓуцрковна соработка на средбата меѓу архиепископот на Тирана и на цела Албанија Јован и митрополитот црногорско-приморски Јоаникиј, која се одржа во седиштето на Албанската архиепископија во Тирана.
На средбата, двајцата црковни поглавари разговараа за положбата на Православната црква во современиот свет, актуелните предизвици со кои се соочуваат помесните цркви, како и за пастирската и мисионерската улога на Црквата во Црна Гора и Албанија.
Посебно внимание беше посветено и на споменот на архиепископот Анастасиј и митрополитот Амфилохиј, кои оставија длабока духовна и пастирска трага и одиграа значајна улога во градењето на братските односи меѓу двете цркви.
Митрополитот Јоаникиј му се заблагодари на архиепископот Јован за можноста свештениците од Црногорско-приморската митрополија повремено да богослужат во црквата „Света Троица“ во Врака, каде што живее српското население, оценувајќи дека тоа е конкретен израз на добрите односи меѓу Албанската архиепископија и Српската православна црква.
Во рамки на посетата на Тирана, митрополитот Јоаникиј го посети и гробот на архиепископот Анастасиј во храмот „Воскресение Христово“, каде што отслужи мал помен.
Средбата во Тирана доаѓа во време кога меѓуправославните односи на Балканот се обременети со геополитички притисоци, национални агенди и чувствителни идентитетски прашања. Токму затоа, ваквите тивки, но содржајни средби меѓу црковни поглавари добиваат пошироко значење од чисто протоколарното.
Албанската православна црква, особено по наследството на архиепископот Анастасиј, се профилира како фактор на стабилност и дијалог во регионот, додека Српската православна црква преку вакви средби испраќа порака за отвореност и пастирска грижа за своите верници надвор од државните граници. Практичната соработка, како богослужењето во Врака, покажува дека меѓуцрковните односи не се сведуваат само на декларации, туку имаат и конкретна духовна димензија.
