За првпат во поновата историја на Бугарската православна црква, верници јавно го прекинаа патријархот Даниил за време на неговата неделна проповед во софиската катедрала „Света Недела“, обвинувајќи го за „отстапување од православната вера“ поради сослужението со Вселенскиот патријарх Вартоломеј, јави порталот двери.бг.
Инцидентот се случи на 25 октомври, непосредно по Литургијата, кога бугарскиот патријарх зборуваше за својата посета на Света Гора од 21 до 24 октомври, реализирана по покана на Зографскиот манастир.
Во обраќањето, Даниил се осврна на критиките што ги предизвика неговото сослужение со Вселенскиот патријарх Вартоломеј. Во изминатите недели, дел од русофилските и зилотски кругови во Бугарската православна црква водеа кампања против посетата, тврдејќи дека спомнувањето на Киевскиот митрополит Епифаниј во диптисите на Вселенската патријаршија претставува „отстапување од верата“.
Додека патријархот зборуваше, неколку присутни жени повеќепати го прекинаа, обвинувајќи го дека ја нарушил православната вера. Наместо да ја прекине проповедта, Даниил им одговори дека црковните прашања не се решаваат со лични пресуди, туку преку соборниот разум на Црквата.
„Не јас лично го поканив Вселенскиот патријарх. Тоа е одлука на Светиот синод и јас ја прифаќам таа одлука“, рече патријархот, додавајќи: „Не патријархот, не јас сум Црквата. Соборниот разум на Црквата е нешто друго.“
„Разговарајте со зографските монаси“
Даниил ги повика оние што се соблазнуваат од сослужението со Вартоломеј да побараат мислење и од светогорските монаси, особено од братството на Зографскиот манастир, наместо да се потпираат само на сопствените убедувања или на свештениците кои ги следат.
Тој откри дека разговарал и со свештеникот Владимир Дојчев од Софиската епархија, кого го советувал да поразговара со светогорските старци за ставовите што ги застапува.
Раскажувајќи за посетата на Света Гора, бугарскиот патријарх соопшти дека игуменот на Хилендарскиот манастир, архимандрит Методиј, изразил желба да учествува на празникот на катедралата „Света Недела“ на 30 октомври заедно со Тимочкиот митрополит Иларион.
Притоа потсети дека Хилендар, како и сите светогорски манастири, е под јурисдикција на Вселенската патријаршија.
„Зошто би дошле од Српската црква да сослужуваат со Бугарскиот патријарх ако Бугарскиот патријарх отстапил од православието?“, праша Даниил.
Патријархот како пример го наведе и Ерусалимскиот патријарх Теофил III, кој, според неговите зборови, не сослужува со клирот на Православната црква на Украина, но истовремено не го прекинува евхаристиското општење со Вселенскиот патријарх и со помесните цркви што ја признаваат украинската автокефалија.
Тој додаде дека токму Ерусалимскиот патријарх ја поздравил бугарската делегација за зачувувањето на црковното општење.
Во завршниот дел од обраќањето, Даниил предупреди дека поставувањето на личната проценка над соборниот разум може да ги одведе верниците кон раскол, повлекувајќи паралела со старокалендарските заедници во Бугарија.
„Одите по една опасна надолна патека со таа ревност која не е според разумот“, рече тој.
Патријархот потсети дека ниту една помесна православна црква не изрекла анатема против Вселенскиот патријарх Вартоломеј, поради што, според него, личните осуди претставуваат ставање на сопственото мислење над Црквата.
Обраќањето го заврши со повик и во општествениот живот да не се дозволи политичките разлики да се претворат во омраза, навреди и поделби, нагласувајќи дека христијаните треба да бидат пример за мир, почитување и подготвеност да го слушнат другиот.
