Голем број катихумени беа примени во Православната црква за време на богослужба на Лазарева сабота,предводена од архиепископот Никита од Тиатири и Велика Британија, во храмот „Дванаесетте апостоли“.
Само во Хартфордшир, 75 нови верници беа примени во Црквата, додека слични богослужби се одржаа и во други градови низ архиепископијата, меѓу кои Бирмингем, Манчестер, Единбург, Кембриџ и Лондон. Вкупно, оваа година околу 250 лица се приклучиле кон Православната црква преку програмата „Discover Orthodoxy“.
Новопримените верници, претежно возрасни со неколку деца меѓу нив, беа примени преку светото крштевање и миропомазание, додека дел од нив пристапиле кон Црквата само преку миропомазание.
Верниците доаѓаат од различни земји и културни средини, вклучително од Велика Британија, Кипар, Грција, Албанија, Бугарија, како и од Африка, Латинска Америка, Азија и други делови од Европа и Комонвелтот.
По завршувањето на богослужбата, новокрстените влегле во храмот со запалени свеќи и за првпат учествувале во Божествената литургија, примајќи ја светата причест.
Архиепископот Никита упати благодарност до свештенството и волонтерите кои учествувале во подготовката на настанот, по што следувала заедничка трпеза во духот на постот, на која присуствувале новите верници, нивните семејства и парохиската заедница.
