Во Италија е покрената истрага откако реставрирана фреска со ангел во црква во Рим предизвика контроверзии поради нејзината наводна сличност со премиерката Џорџа Мелони, пишува cnn.com, пренесува ДИНА.МК. Сликата се наоѓа во капелата на Светите души во чистилиштето во базиликата „Свети Лаврентиј во Лучина“, а контроверзноста се разгоре откако на социјалните мрежи беа објавени споредбени фотографии од обновениот херувим и Мелони.
Италијанскиот министер за култура, Алесандро Џули, нареди истрага за тоа дали реставраторот намерно го додал ликот на Мелони на фреската. Надлежната служба за Рим, која го надгледува културното наследство на главниот град, спроведува архивско истражување за да ја спореди реставрацијата од 2025 година со оригиналната слика создадена во 2000 година. Даниела Поро, раководителка на службата, изјави дека делото е современо и не е заштитено културно добро, што значи дека измените се дозволени, но морало да бидат договорени со надлежните институции.
Реставраторот Бруно Валентинети негираше дека ја направил сликата да личи на италијанската лидерка, изјавувајќи за локалните медиуми дека го копирал оригиналниот цртеж и работел бесплатно како волонтер. Кардиналот Балдо Реина, викар на капелата, во соопштение наведе дека сликите од светата уметност не можат да се злоупотребуваат и дека измената била иницијатива на декораторот која не била соопштена на надлежните власти. Парохискиот свештеник Даниеле Микелети ја потврди сличноста, но за весникот „Ла Република“ изјави дека не ја разбира „вревата“.
Случајот привлече стотици луѓе во капелата, која го доби прекарот „Капелата Мелони“. Самата премиерка на социјалните мрежи објави дека дефинитивно не личи на ангел, додавајќи емотикон што се смее.
