Светиот синод на Црквата на Грција направи пресврт во случајот со поранешниот митрополит Калавритски и Егијалиски Амвросиј, откако одлучи да го повлече неговото одликување, планирано за октомвриското заседание на Светиот архијерејски собор.
Одлуката е донесена на седницата на Светиот синод на 10 септември 2026 година, откако до членовите на Синодот било испратено писмо од Амвросиј.
Светиот синод во своето соопштение наведува дека содржината на писмото ја оценил како „навредлива“ кон телото на Светиот синод, но и кон Светиот архијерејски собор на Црквата на Грција.
По поименично гласање, членовите на Светиот синод едногласно одлучиле да ја поништат одлуката донесена на 26 август, со која на поранешниот митрополит му беше определено да му биде доделен „Златниот крст со ѕвезда на Одликувањето на Светиот апостол Павле“ на Црквата на Грција.
„Имајќи го предвид неодамна испратеното писмо на блаженопочитуваниот митрополит, поранешен Калавритски и Егијалиски, г. Амвросиј, до членовите на новиот 170-ти Синодски период, и сметајќи дека неговата содржина е навредлива кон телото на Светиот синод, но и кон Соборот на архијереите на Црквата на Грција, по спроведеното поименично гласање, едногласно одлучи да ја повлече одлуката на Светиот синод од 26 август оваа година“, стои во соопштението.
Амвросиј беше митрополит Калавритски и Егијалиски до 2019 година, кога се повлече од митрополитската должност. Во текот на својата архијерејска служба, но и по пензионирањето, тој често настапуваше со остри ставови за црковни и општествени прашања.
