Украинската амбасадорка во Македонија, Лариса Дир, го посети Бигорскиот манастир, каде што остварила средба со епископот Антаниски Партениј и му го честитала 56-тиот роденден.
Според соопштението на Бигорскиот манастир, Дир дошла во манастирот за да се поклони на светињата и да побара благослов пред моштите и светоста на свети Јован Крстител. Во разговорот со епископот Партениј, таа му упатила желби за долг живот и духовен напредок на Бигорската обител.
Од манастирот наведуваат дека епископот Партениј изразил солидарност со украинскиот народ, кој и натаму ги поднесува последиците од војната со Русија, и надеж дека насилството наскоро ќе престане.
Посетата се случува во време кога војната во Украина продолжува, а руската воена агресија предизвикува тешки последици за украинското население.
