Турските власти вратија ангелска статуа, украдена пред 22 години, на православната заедница под јурисдикција на Вселенската патријаршија, на свеченост одржана во Археолошкиот музеј во Истанбул.
Министерот за култура и туризам Мехмет Нури Ерсој изјави дека станува збор не само за враќање на уметнички предмет, туку и за „обнова на културната меморија и израз на правото, почитта и заедничките вредности“.
Статуата била украдена од манастирот „Свети Ѓорѓи“ на островот Халки и била пронајдена во 2004 година во Денизли. По спроведени правни процедури и соработка со патријаршијата, предметот е официјално вратен.
Ерсој потсети и на враќањето на 12 икони украдени од храмови на островот Гокчеада, оценувајќи дека овие случаи ја покажуваат политиката на Турција за враќање и заштита на културното наследство.
Во своето обраќање, министерот нагласи дека од 2018 година досега, државата инвестирала над 60 милијарди турски лири во реставрација, изградба на музеи и инфраструктура поврзана со културното наследство. До 2025 година, повеќе од 33 милиони посетители ги посетиле музеите и археолошките локалитети во земјата.
Според податоците на министерството, од 2002 година наваму се вратени над 13.000 културни артефакти, додека само во периодот 2020–2025 година биле обезбедени повеќе од 1,3 милиони предмети.
Министерот истакна дека културното наследство претставува универзално богатство што ги надминува границите, додавајќи дека неговата заштита е важна не само за минатото, туку и за иднината.
