Во Атина се одржа свечената заклетва на новиот муфтија на Дидимотихо, Емин Шериф, настан кој грчката влада го оцени како особено значаен за државата и за муслиманското малцинство во Тракија.
За настанот информираше и министерката за образование, верски прашања и спорт на Грција, Софија Захараки, која истакна дека за првпат во целост се применува современ, транспарентен и институционално уреден модел за избор и верификација на муфтиите.
Според неа, со ова се потврдува дека законите не остануваат само формални норми, туку реално се спроведуваат во пракса. Во своето обраќање, Захараки нагласи дека Грција ја темели својата општествена кохезија врз религиозната слобода, заемната почит и мирниот соживот, како трајни и недвосмислени вредности. Таа потенцираше дека во време на глобални тензии и поделби, дијалогот, разбирањето и институционалниот поредок остануваат единствениот сигурен пат кон стабилност и напредок.
Посебен акцент беше ставен на Законот 4964/2022, со кој државата, според официјалните ставови, ја зајакнала институционалната улога и угледот на муфтијата, обезбедувајќи кредибилен и модерен процес на избор, усогласен со Уставот на Грција, Договорот од Лозана и европското право.
На церемонијата присуствуваа претставници на државните институции, пратеници, претставници на муслиманското малцинство, набљудувачки муфтии, верски службеници и истакнати членови на заедницата, што, според грчките власти, е потврда за инклузивниот пристап и стремежот кон заедничка иднина заснована на почитување на различностите.
