Осумнаесетгодишниот Стојан Василев од Гевгелија е најсреќниот меѓу петнаесетината млади момчиња кои во осветената вода на реката Вардар се пуштија по чесниот крст на денешниот богојавленски собор, на кој присуствуваа повеќе од илјада граѓани.
– Првпат учествувам и многу сум радосен што веднаш ми се посреќи да го фатам чесниот крст. Мојата радост и вербата во Бога со своите другари ќе ја пренесам во сите христијански домови во Гевгелија, рече Василев.
Градоначалникот на општина Гевгелија Иван Франгов му ја честиташе радоста на Стојан Василев на кого му подари лаптоп и му посака многу здравје и среќа во животот. Фармацевтската компанија „Зегин“ на гевгелискиот славодобитник му подари телевизор.
/МИА
