Руската православна црква објави дека ќе воведе посебна молитва посветена на „вразумување“ на жените кои планираат абортус. Одлуката ја донесе Светиот синод, а текстот на молитвата треба да биде финализиран до 1 декември оваа година.
Иницијативата дојде од Патријаршиската комисија за семејни работи, заштита на мајчинството и детството, која предложи воведување на „посебна молитва за спречување на убиство на деца во утробата“.
Во официјалниот документ се наведува: „Претседателот на Патријаршиската комисија за семејни работи, заштита на мајчинството и детството, свештеникот Феодор Лукјанов, откако ги проучи апелите упатени до претседателот на Руската православна црква, презентираше предлог за создавање посебна молитва за спречување на убиство на деца во утробата“.
Синодалната литургиска комисија е одговорна за изготвување на текстот, која треба да ја подготви конечната верзија на молитвата до наведениот рок. Целта на молитвата, како што се наведува, е да ги „одврати жените од извршување на убиство на дете во утробата“.
Според одлуката на Синодот, молитвата ќе се чита секоја година на 11 јануари, по светата Литургија, на денот на сеќавањето на 14.000 момчиња од Витлеем убиени по наредба на кралот Ирод. Во други прилики, ќе може да се моли според одлуката на парохискиот свештеник или по барање на верниците.
Одлуката на Синодот дојде кратко откако митрополитот Томски и Асиновски Ростислав го привлече вниманието на јавноста со совети до Русите кои извршиле прељуба. Според порталот Инфо24, тој рекол дека мажот не треба да ѝ признава неверство на својата сопруга ако тоа може да „го уништи семејството“.
Наместо тоа, како што додава истиот извор, митрополитот препорачал да се покаат за гревот за време на исповед.
/кајгана.мк
