Муслиманите и христијаните потпишаа заедничка декларација со која едногласно го осудија верскиот екстремизам и радикализам.
Улогата на религиите во промовирањето на мирот и спречувањето на насилство беше главната тема на дводневниот дијалог меѓу муслиманскиот совет на старешините и на Светскиот совет на црквите (ССЦ) во Женева, Швајцарија од 30 Септември до 1 октомври.
На двете сесии од разговорите беа вклучени презентации и дискусии за клучните аспекти на градење на мирот и меѓурелигискиот дијалог, со особено внимание на борбата против верскиот екстремизам.
Меѓу дел од пораките е онаа дена верските раководства и на христијаните и на муслиманите, треба да биде похрабри отколку што се сега. Да ги осудуваат сите напади врз друга вера, а не како што сега има моменти кога верските лидери имаат еден вид на тивко одобрување за тоа што го прават нивните следбеници.
Во заедничката декларација верските лидери се обврзуваат на поголеми координирани заеднички акции за соочување со феноменот на насилството, преглед на причините за појавата и заедничка работа на предлагање решенија на интелектуално, научно, социјално и образовно ниво за соочување со тој феномен.
-Развојот на настаните во текот на последните години се поголеми од кој било поединец, црква, верска заедница, дури и државата, за да може сами со нив да се соочуваат. Мора да има нова форма на дијалог со кој ќе се менува наративот од беспомошност и конфликт во надеж и ветување, посочуваат верските лидери.
Меѓу преземените обврски од заедничката декларација на муслиманите и христијаните се одбивање на сите форми на екстремизам и дискриминација врз основа на верска, расна, полова и етничка припадност. Поттикнување на духовните лидери да работат со соодветни национални тела и органи за подобрување на презентација и предавање на религијата. Истражување на заеднички начини да се афирмира виталениот придонес на жените, особено на религиозно инспирирани за градење на мирот. Зајакнување и ангажирање на младите луѓе во верските заедници. Поттикнување на прекин на трката зо вооружување, која се заканува на безбедноста на сите народи и поттикнување за користење на националните ресурси за борба против сиромаштијата, незнаењето и болестите кои ги оптоваруваат и сиромашните и богатите земји. Повик кон сите верски лидери да работат и да се стремат за правда и мир за целото човештво.
Верските лидери на муслиманите и христијаните својот дијалог во оваа форма ќе го продолжат во март 2017 година на нова средба во Каиро, Египет.
