Московскиот патријарх Кирил објави книга посветена на војната, во која вооружениот конфликт го разгледува не само како политички и воен настан, туку како духовна и историска борба меѓу доброто и злото. Книгата со наслов „Војната. Надвор од видливите причини и последици“, објавена од Издавачката куќа на Московската патријаршија, е претставена како дело за „метафизиката на војната“.
Во книгата патријархот Кирил зборува за поимите жртва, подвиг, патриотизам и победа од „посебен духовен агол“, при што војната ја поврзува со искупително значење и со историската мисија на Русија.
„Неговата Светост патријархот зборува за искупителното значење и последиците од војната, за метафизичките граници и целите на Русија“, се наведува во најавата за книгата.
Според претставувањето на изданието, светот се наоѓа во постојан судир меѓу доброто и злото, а исходот од војната, според патријархот Кирил, зависи од тоа кој е „на страната на светлината“. Во тој контекст тој ги повикува верниците да бидат „воини Господови“ кои се спротивставуваат на злото и ги бранат високите морални идеали.
Во книгата рускиот патријарх пишува дека рускиот народ носи „голема одговорност“ да не отстапи од својот историски долг „да биде победник“.
Објавувањето на вакво дело претставува продолжение на линијата на Московската патријаршија во која војната се толкува преку религиозен јазик. Од почетокот на руската инвазија врз Украина во 2022 година, патријархот Кирил повеќепати ја оправдуваше воената политика на Москва, нарекувајќи ја борба со духовни и цивилизациски димензии.
Тој во повеќе наврати зборуваше дека руските војници кои загинуваат на фронтот прават жртва со духовно значење, а војната против Украина ја претставуваше како продолжение на борбата против „злото“ од Втората светска војна.
Критичарите на ваквиот пристап оценуваат дека Московската патријаршија постепено ја напушта улогата на само верска институција и станува дел од идеолошкиот апарат на руската држава, каде православните симболи и религиозниот јазик се користат за легитимирање на политички и воени цели.
Книгата „Војната. Надвор од видливите причини и последици“ доаѓа во период кога односот меѓу Руската православна црква и руската државна политика е под зголемено меѓународно внимание. Европската унија во повеќе наврати разгледуваше можност за санкции против патријархот Кирил поради неговата поддршка на руската воена политика, но неговото вклучување на санкциски листи беше блокирано.
Посебно внимание привлекува и фактот што на илустрацијата на книгата се прикажани Гиви и Моторола – команданти на проруските сепаратистички сили во Донбас, кои раководеа со вооружени формации и загинаа во атентати во 2016 и 2017 година.
