Митрополитот на Замбија и Мозамбик, Јован, од Александриската патријаршија, упати итен апел за хуманитарна помош за Мозамбик, кој во последните недели е погоден од разорни поплави и екстремни временски појави.
Во своето обраќање, митрополитот предупреди дека земјата се соочува со сериозна и брзо ескалирачка хуманитарна криза, истакнувајќи дека повторените поплави и тропските циклони тешко ги погодиле јужните и централните делови на Мозамбик.
Тој нагласи дека размерите на катастрофата се огромни, како во однос на изгубените човечки животи, така и во уништувањето на населени места и клучна инфраструктура неопходна за опстанокот на населението. Според актуелните проценки, до крајот на дождовната сезона, во април 2026 година, повеќе од два милиона луѓе би можеле да бидат погодени.
Со чувство на пастирска одговорност и солидарност, митрополитот Јован упати јавен повик за помош, истакнувајќи дека светата митрополија вложува максимални напори за собирање и испраќање хуманитарна помош, со посебно внимание кон најранливите категории – жените, децата, повредените и сите оние кои се во итна потреба. Епархијата, во соработка со Хеленскиот црвени крст и локалните институции, може да обезбеди транспарентна, брза и ефикасна дистрибуција на помошта, при што веќе се подготвува контејнер за транспорт на хуманитарни средства кон Мозамбик.
Тој укажа дека постои сериозен недостиг од основни средства, меѓу кои шатори и привремени засолништа, облека и постелнина, храна и вода за пиење, медицински и фармацевтски материјали, санитарна опрема, како и техничка и оперативна поддршка во областа на цивилната заштита.
