Од околу 1,005 милиони евра издвоени за погребот на покојниот католикос-патријарх Илија Втори, биле потрошени околу 242 илјади евра, соопштил грузискиот премиер Иракли Кобахидзе, во услови на полемики за тоа дали средствата биле ненаменски потрошени, пишува 1TV.ge.
Кобахидзе на 14 септември, во дебата на „Рустави 2“, изјавил дека станува збор за прелиминарни податоци и дека дополнително ќе ја разгледа документацијата пред да објави подетални информации.
Според него, за погребот биле издвоени 3 милиони грузиски лари, односно околу 1,005 милиони евра, додека биле потрошени 722 илјади лари, или околу 242 илјади евра.
„Тие рекоа дека трошоците поврзани со погребот на патријархот биле направени нечесно и дека наводно биле украдени пари“, рекол Кобахидзе.
Тој оценил дека фактот што не бил потрошен најголемиот дел од издвоениот износ не ги потврдува таквите тврдења. Доколку, како што рекол, некој имал намера да ги присвои средствата, „лесно можел да ги потроши сите три милиони“.
На изјавите на премиерот реагирал протоереј Андрија Џагмаидзе, раководител на Службата за односи со јавноста на Грузиската Патријаршија.
Тој навел дека Патријаршијата уште од почетокот знаела дека најголемиот дел од средствата издвоени за погребот нема да бидат потрошени.
Според Џагмаидзе, во периодот околу погребот Патријаршијата била во редовен контакт со тогашната министерка за култура Теа „Тика“ Рухадзе, од која, како што наведува, добивале информации дека организации и физички лица кои обезбедувале различни услуги во најголем дел се откажале од наплатата или плаќањето.
„Премиерот јавно го потврди ова и се надевам дека користењето на името на патријархот за неосновани обвинувања и клевети ќе престане“, рекол Џагмаидзе.
Кобахидзе нагласил дека податоците за потрошените 722 илјади лари се прелиминарни и најавил дополнителна проверка пред објавување на подетални информации за трошоците.
