Архиепископот Елпидофор од Америка изјави дека војната што Русија ја води против Украина претставува сериозна закана за единството на Православието и ја разоткрива длабоката политизација на Руската православна црква. Во интервју за украинскиот медиум „Виче“, посветен на православниот дијалог, тој оцени дека црковното раководство во Москва сè повеќе функционира како инструмент на државната политика.
Осврнувајќи се на речиси два милиони загинати, исчезнати или ранети лица во војната меѓу Русија и Украина, архиепископот потсети на ставот на Вселенскиот патријарх Вартоломеј дека раководството на Руската православна црква е ставено во служба на секуларните, воените и политичките интереси на руската држава. Според него, тоа е „многу опасен пат“ кој не им служи ниту на верниците ниту на самата Црква. „Рускиот народ е верен народ. Тој заслужува Црква што ќе биде верна на Евангелието и на православното Предание, а не црковно раководство кое дејствува како продолжена рака на државата“, истакна Елпидофор.
Тој се осврна и на неодамнешните изјави на Руската служба за надворешно разузнавање, нагласувајќи дека за оние кои ја познаваат историјата на односот меѓу државата и Црквата во Русија, таквите настапи не се изненадување. Според него, уште од царските времиња, Православието често било користено како државна алатка.
Архиепископот оцени дека вмешувањето на разузнавачка служба во црковни прашања е недозволиво и опасно, бидејќи Црквата не е секуларна институција, туку духовно тело кое мора да го зачува евхаристиското и канонското општење. „Ниту една држава нема право да ѝ диктира на Црквата што да прави“, рече тој.
Во врска со Украина, Елпидофор потсети дека во 2019 година Вселенската патријаршија го додели Томосот за автокефалност на Православната црква на Украина, која го избра митрополитот Епифаниј за свој поглавар, додека Украинската православна црква предводена од митрополитот Онуфриј остана поврзана со Московската патријаршија.
Тој нагласи дека Вселенската патријаршија има улога да помогне во обновата на православното единство во Украина, оценувајќи дека притисоците врз украинската Црква во минатото биле политички, а не црковни по природа. Според Елпидофор, дел од украинските архиереи и свештеници не ѝ се приклучиле на новата автокефална Црква поради уцени, притисоци и закани од руски безбедносни служби.
На крајот од интервјуто, архиепископот зборуваше и за своите лични врски со украинскиот православен свет и за посетите на Украина, изразувајќи длабока болка поради, како што рече, „варварската инвазија на братската земја“. Тој нагласи дека сочувствува со украинскиот народ и со сите мајки од двете страни кои ги губат своите деца во војната.
