Рајан Хигинс, виш советник на американскиот министер за одбрана Пит Хегсет за верски прашања, со години објавувал расистички и хомофобни пораки, ги напаѓал муслиманите и имигрантите и ширел теории на заговор. Анализата на стотици негови објави, видеоснимки и архивирани текстови ја објави Си-ен-ен.
Според истражувањето на американската телевизија Си-ен-ен, Хигинс, кој во Пентагон стана еден од поважните соработници на Хегсет за верски прашања, јавно промовирал ставови што ги доведуваат во прашање верската и расната еднаквост, правата на ЛГБТК-заедницата и одвоеноста на Црквата од државата.
Неговите објави отвораат прашања за влијанието на христијанскиот национализам врз актуелното раководство на американското Министерство за одбрана. Повеќе извори наведуваат дека Хигинс имал значително влијание врз реториката на Хегсет и неговото нагласување на христијанско-националистичките теми, иако други го опишуваат како еден од повеќето советници во неговиот тим.
Оваа година Хигинс објавил порака придружена со карта на САД и натпис „ОВА Е ХРИСТИЈАНСКА НАЦИЈА“. Во јуни, пак, тврдел дека „одвојувањето на Црквата од државата не постои“, обвинувајќи ги христијаните дека дозволиле американското општество да назадува.
Неговите ставови за исламот и имиграцијата биле особено остри. Коментирајќи извештаи за сексуални злосторства што наводно ги извршиле мигранти во Европа, Хигинс напишал дека тие „се однесуваат како варвари, ги убиваат и силуваат нашите бели жени“.
Во друга објава, припадниците на одредени мигрантски култури ги нарекол „апсолутни животни“, додавајќи дека за таквите култури „нема место во западниот свет“. Претходно тврдел дека исламот ги учи своите следбеници да ги убиваат сите што нема да му се покорат.
Во февруари, Хигинс ја бранеше објавата на американскиот претседател Доналд Трамп во која поранешниот претседател Барак Обама и неговата сопруга Мишел беа прикажани како мајмуни.
„Видеото е смешно, веројатно малку невкусно со оглед на функцијата, но не разбирам зошто прикажувањето на Обама како мајмун е порасистичко од другите прикази“, напишал Хигинс.
За време на протестите во САД во 2020 година, тој негирал дека во земјата постои проблем со системскиот расизам, го напаѓал движењето „Блек лајвс метер“ и Џорџ Флојд, а подоцна се потсмевал на муралот посветен на Флојд, оштетен од удар на гром.
Хигинс објавувал и навредливи коментари за поранешната потпретседателка Камала Харис, тврдејќи дека нејзиниот политички напредок се должи на „неморални сексуални врски“. Тој ја доведувал во прашање и нејзината номинација за потпретседателка, тврдејќи дека била избрана поради полот и бојата на кожата, а шпекулирал и за нејзиниот сексуален живот и можни абортуси.
Според Си-ен-ен, тој учествувал во обликувањето на некои од најострите говори на Хегсет за таканаречената „култура на војна“, како и во основањето на новата Канцеларија за верски прашања во Пентагон.
Во последните месеци, Хегсет почнал да организира месечни христијански богослужби во Пентагон и често зборува за потребата од духовна обнова на американската војска.
Хигинс не одговорил на барањето на Си-ен-ен за коментар. Портпаролот на Пентагон, Шон Парнел, го нарекол „ценет член на тимот на министерот“, кој „одлично ја извршува работата како виш советник“, но не одговорил на конкретните прашања за неговите објави.
