Бугарскиот патријарх Даниил од 25 до 30 септември ќе престојува во Ерусалим, каде што на 27 септември заедно со патријархот Теофил III ќе служи Божествена литургија, а во фокусот на посетата се очекува да биде и повикот за мир на Блискиот Исток, пишува Orthodox Times.
Посетата на патријархот Даниил на Ерусалимската патријаршија е на покана на патријархот Теофил III и по одлука на Светиот Синод на Бугарската православна црква.
Двајцата патријарси заеднички ќе ја отслужат Божествената литургија на 27 септември. Во програмата се предвидени и официјални средби и разговори, како и посети и поклонување на најзначајните христијански светињи во Светата земја.
По престојот во Ерусалим, патријархот Даниил ќе ја продолжи посетата во Јордан, каде што се предвидени средби и поклонички посети. Според програмата, планирана е и средба со јорданскиот крал Абдула II.
Посетата се одржува во контекст на долгогодишните духовни и братски врски меѓу Бугарската православна црква и Ерусалимската патријаршија.
Од двете црковни страни се очекува посебно внимание да биде посветено и на состојбата на христијаните во Светата земја и на потребата од мир на Блискиот Исток, со заедничка молитва на двајцата патријарси за мир во регионот.
Во делегацијата на Бугарската православна црква ќе бидат и митрополитот Јован Варненски и Великопреславски, митрополитот Серафим Неврокопски и епископот Герасим Меленикиски, главен секретар на Светиот Синод.
