Патријархот на Александрија и цела Африка, Теодор II, му го додели високото одликување „Златен лав од Редот на Лавот на Александрија“ на истакнатиот јордански новинар Фуад Ал Каршех, во знак на признание за неговата долгогодишна, одговорна и професионална новинарска дејност, неговата изразена општествена работа и неговата постојана поддршка на христијаните на Истокот, а особено на Православната црква.
Свеченоста се одржа во Патријаршиското седиште во Александрија, во присуство на сопругата на одликуваниот, г-ѓа Софија Разук, во атмосфера на заемно уважување и почит.
Во своето обраќање, патријархот Теодор ја истакна професионалноста и чесноста, сериозноста и повеќеслојниот придонес на Фуад Ал Каршех во новинарството, нагласувајќи дека неговото дело не се ограничува само на бележење на настаните, туку активно придонесува за обликување на свеста, за општествената кохезија и за одговорноста во јавниот простор.
Патријархот потсети на својата длабока и долготрајна љубов кон Кралството Јордан, истакнувајќи дека уште од младоста неговите духовни отци во него всадиле почит и љубов кон светите места, а особено кон благословената земја Јордан – земјата на Христовото крштение и на историскиот соживот на народи и традиции.
Тој ја нагласи историската улога на јорданските кралеви во заштитата на светите храмови, зачувувањето на христијанското присуство и унапредувањето на мирниот соживот и дијалогот на Блискиот Исток. Со особено топли зборови зборуваше за кралот Абдула II, истакнувајќи ја неговата мудрост, одговорност и неговата улога како чувар на светите места и гласник на мирот, правдата и човечкото достоинство на меѓународната сцена.
Во овој контекст, патријархот се осврна и на Аманската порака, оценувајќи ја како меѓународно призната иницијатива која промовира меѓурелигиска почит, го отфрла религиозниот екстремизам и го темели дијалогот врз достоинството и мирот. Тој нагласи дека духот на оваа порака е во согласност со вековното православно сведоштво на Александриска патријаршија и со духот на мирен соживот во Египет..
Патријархот потсети и на активната улога на Александриска патријаршија во Советот на црквите на Блискиот Исток и во Советот на црквите во Египет, во служба на мирот и заедничкото христијанско сведоштво.
Тој истакна дека неговото познанство и духовна врска со одликуваниот новинар и неговото семејство трае дваесет години, период во кој се изградиле длабока доверба и заемна почит.
Видливо трогнат, патријархот изрази благодарност и кон благословената земја Јордан, од која, како што рече, Александриска патријаршија добила двајца истакнати архијереи кои служат со висок црковен етос и свест.
Во својот одговор, Фуад Ал Каршех ја изрази својата длабока благодарност и трогнатост, пренесувајќи ја искрената желба на многу истакнати личности од Јордан патријархот повторно да ја посети земјата. Патријархот Теодор со радост ја прифати поканата и изрази надеж дека, со Божја помош, во блиска иднина ќе оствари нова посета на Јордан.
