Во источна Уганда, 62-годишен маж со нож го усмртил својот 33-годишен син, откако овој преминал од ислам во христијанство, јавуваат локални извори.
Инцидентот се случил на 28 јануари во округот Игaнга, на патот Калииро–Игaнга, околу пет километри од градот Игaнга. Според изјавата на сопругата на жртвата, Нангоби Мариати, нејзиниот сопруг Хамба Џума бил нападнат со долг нож, познат локално како „панга“.
Жртвата била татко на четири деца на возраст од 12, 10, 7 и 3 години.
Мариати изјавила дека тој ден со сопругот работеле на садење ориз, а при враќањето дома го затекнале таткото на Џума. По заедничката вечера, таткото побарал од нивниот син да му го даде ножот. Набргу потоа го повикал својот син, по што, според сведоштвото, го нападнал и побегнал од местото на настанот.
Соседи изјавиле дека непосредно по нападот виделе мотоцикл кој со голема брзина заминал кон градот, што, според семејството, укажува на можност за претходно испланирано бегство.
Повредениот бил пренесен во болница, но таму бил прогласен за мртов.
Според вдовицата, нападот бил мотивиран од нивното преминување во христијанство. Таа изјавила дека семејството на сопругот и претходно им упатувало закани поради напуштањето на исламот.
До моментот на објавување на информацијата, полицијата немала спроведено официјална истрага, според локалните извори.
Уставот на Уганда гарантира верска слобода, вклучително и правото на промена на верата. Муслиманите сочинуваат околу 12 проценти од населението, со поголема концентрација во источните делови на земјата.
