На почетокот на 2026 година, полицијата во кинеската провинција Сичуан приведе неколку истакнати членови на катакомбна христијанска заедница, во потег што се оценува како дел од засилената контрола на Пекинг врз нерегистрираните христијански групи во земјата.
Апсењата на водачи на црквата „Ран дожд“ се толкуваат како силна порака до сите нерегистрирани христијански заедници во Кина. Верници и организации за заштита на верските слободи предупредуваат дека овие мерки дополнително го зголемиле стравот кај заедниците кои и досега функционирале на работ од официјалната толеранција.
Во градот Дејан, локалните власти ги одвеле од нивните домови црковниот лидер Ли Инцјанг и неговата сопруга Џанг Синјуе, соопштија претставници на црквата. Во истата акција биле приведени и пасторот Даи Џичао, како и мирјанинот Је Фенгхуа.
Според црковни извори, најмалку уште четири лица биле краткотрајно задржани, а потоа ослободени, додека за некои од нив сè уште нема информации. Бирото за јавна безбедност во Дејан и во блискиот главен град на провинцијата, Ченгду, не дадоа официјален коментар.
Овие приведувања се надоврзуваат на серија слични акции низ земјата. Во октомври 2025 година, 18 високи членови на нерегистрираната црква „Сион“ беа уапсени во рамки на национална операција, а два месеца подоцна, според податоци на организации за човекови права, околу 100 верници биле задржани во провинцијата Џеџијанг.
Според Human Rights Watch, приведувањето на Ли Инцјанг се вклопува во поширок образец на државна репресија насочена кон таканаречените „домашни цркви“ – протестантски заедници кои се собираат во приватни простории, наместо во објекти одобрени од државата.
Во повеќе случаи, приведените се соочуваат со нејасни обвиненија, како „поттикнување раздори и нарушување на јавниот ред“, формулации кои често се користат за задржување на верници без јасни докази за кривично дело.
За многу нерегистрирани христијани, последните апсења се потврда дека просторот за слободно практикување на верата надвор од државниот систем сè повеќе се стеснува. Иако кинескиот устав формално гарантира слобода на религијата, во пракса положбата на бројни верници станува сè понесигурна.
Под водство на кинескиот претседател Си Џинпинг, се спроведува политика позната како „китаизација на религијата“, чија цел е усогласување на сите верски практики со идеологијата на Комунистичката партија. Таа политика вклучува засилен надзор врз богослужбите, верското образование и онлајн-проповедите.
Црквата „Ран дожд“ и претходно била цел на репресивни мерки. Нејзиниот основач, пасторот Ванг И., во 2019 година беше осуден на девет години затвор по обвиненија, меѓу кои и „поттикнувања против државната власт“. Тогаш, повеќе од 100 членови на заедницата беа приведени во масовна полициска акција.
Иако експертите сметаат дека катакомбните христијански заедници историски покажале голема издржливост, останува отворено прашањето дали засилениот притисок ќе доведе до нивно намалување или, пак, ќе ги турне уште подлабоко во нелегалност.
