Eвропскиот митрополит Пимен повика на единство меѓу владиците пред денешниот празник посветен на светите апостоли Петар и Павле.
„И којзнае како ќе се развиваше Црквата ако апостолите наместо Светиот Дух и меѓусебната љубов ги воделе суетата, меѓусебните кавги, клевети, омаловажувања.
Оти сепак биле луѓе со човечки слабости, со различна наобразба, потекло, капацитети.
Но ним Бог и неговите заповеди им биле нивниот пат, вистина и живот, а не газањето преку живи луѓе за да го исправат патот до постигнување на личната кариера.
Можеме и ние денешните нивни следбеници подобро, ако само наместо да се делиме меѓусебно и да се множиме со нула почнеме да се собираме заеднички на светата литургија. Еве за почеток утре во чест на светите Апостоли Петар и Павле. А потоа и ако си подадеме рака и ако си покажеме нелицемерна почит, разбирање и љубов.
За многу години и за многу поразумни размислувања! о. Пимен“, објави Европската епархија.
