Романскиот патријарх Даниел предупреди дека традиционалното семејство се соочува со сериозна криза и со „трансформација кон неизвесна и збунувачка иднина“.
Пораката патријархот ја упати на завршната свеченост на Меѓународната средба на православната младина за 2026 година, која се одржа во четвртокот во Националната катедрала во Букурешт.
Осврнувајќи се на темата на средбата „Младите, семејството и животот во Христа“, патријархот Даниел истакна дека семејството составено од маж, жена и деца е „благослов и дар од Бога за Црквата, народот и човештвото“.
Според него, кризата на семејството пред сè има духовен карактер и произлегува од „губењето на свештеното значење на човечкиот живот и на смирената и самопожртвувана љубов“.
Патријархот посочи дека материјалистичкиот индивидуализам и, како што рече, „гордоста на себичната слобода“ го поткопуваат разбирањето на човечкиот живот како нешто што се темели на заедништво и солидарност.
Затоа, тој повика на повторно нагласување на врската меѓу семејството и црковната заедница, односно евхаристиската заедница.
„Љубовта во семејството е повикана да стане икона на Божјата љубов кон човештвото и икона на вечната љубов во Света Троица“, порача романскиот патријарх.
Говорејќи врз основа на Светото писмо и учењето на светите отци, Даниел го опиша семејството како слика на троичниот живот и заедништво, посочувајќи дека во Новиот завет бракот е претставен и како пророчка слика на односот меѓу Христос и Црквата.
Тој ја истакна и заемната улога на семејството и Црквата. Црквата, како што рече, ги благословува и духовно ги поддржува семејствата, додека христијанските семејства придонесуваат кон животот и мисијата на Црквата преку воспитувањето на децата во верата.
Во услови на сè пофрагментирано и посекуларизирано општество, патријархот Даниел ги повика христијанските семејства активно да учествуваат во богослужбениот живот на парохиите и да ја користат пастирската поддршка на Црквата.
Тој нагласи и дека за воспитувањето на децата е потребна соработка меѓу семејството, Црквата и училиштето.
На крајот од пораката, романскиот патријарх им се заблагодари на младите православни христијани кои учествуваа на средбата во Букурешт и ги повика да станат „апостоли на сеправославното братско заедништво и амбасадори на пријателството и радоста во светот“.
