Бугарскиот патријарх Даниил на 21 октомври ја почна својата прва посета на Света Гора – Атон во својство на поглавар на Бугарската православна црква. Посетата почна во Кареја, административниот центар на светогорската монашка заедница, каде што патријархот беше пречекан од Протепистот и претставници на Светиот Кинот.
Патријархот Даниил е придружуван од неврокопскиот митрополит Серафим, врачанскиот митрополит Григориј, мелничкиот епископ Герасим, главен секретар на Светиот синод, и левкискиот епископ Климент, викар на митрополитот на САД, Канада и Австралија. Во делегацијата се и архимандритот Епифаниј, протосингел на Неврокопската митрополија, протодјаконот Иван Петков и ѓаконот Симеон Борисов од Врачанската епархија.
На пречекот присуствувал и генералниот конзул на Република Бугарија во Солун, Антон Марков.
Во раните утрински часови, поглаварот на Бугарската православна црква стапил на Света Гора, позната и како Градината на Пресвета Богородица, каде што монасите со векови се молат за прошка на гревовите и спасение на душите, не само за себе, туку и за целиот свет.
Првото место што го посетил патријархот Даниил била Кареја, административниот центар на Света Гора. Таму бил пречекан од протепистот, старецот Георгиј од манастирот Ватопед, како и од претставници на Светиот Кинот – највисокото административно тело на светогорската монашка заедница.
Во Светиот Кинот членуваат по еден претставник од секој од дваесетте светогорски манастири, кои заеднички учествуваат во управувањето со монашката заедница и во зачувувањето на нејзиниот посебен статус.
Во соборниот храм „Успение на Пресвета Богородица“, познат како Протатон, било отслужено молитвословие. Потоа патријархот Даниил и членовите на делегацијата се поклониле пред чудотворната икона на Пресвета Богородица „Достојно ест“.
Во поздравното слово, архимандритот Георгиј ја изразил духовната радост на светогорските монаси по повод посетата на бугарскиот патријарх.
„Вашата денешна посета овде е голем благослов за светогорските отци. Вашата посета не е само официјална визита, туку и можност да се обноват историските и духовните врски што ја поврзуваат Бугарската црква со Света Гора – Атон“, истакнал архимандритот Георгиј.
Тој нагласил дека Света Гора зазема посебно место во животот на православието, како простор во кој илјадници монаси низ вековите му го посветиле животот на молитвата, подвигот и стремежот кон совршенство во Христа.
Бугарскиот патријарх му се заблагодарил на домаќинот за топлиот пречек и го истакнал своето духовно доживување од првата посета на Света Гора во својство на патријарх.
„Овде, на Света Гора, самата историја е проникната со светост, каде што Пресвета Богородица, со своите чудотворни икони, ги зачувувала светите манастири, а секое место е осветено од илјадниците подвижници што живееле овде“, изјавил патријархот Даниил.
Тој ги истакнал вековните врски меѓу Бугарија и Света Гора, кои, како што посочил, особено се изразуваат преку стотиците поклоници и добротвори кои им помагаат на светогорските манастири.
Бугарската делегација за време на посетата ја придружува и митрополитот милетски Апостол од Вселенската патријаршија, игумен на ставропигијалната света обител „Света Анастасија Узорешителница“, која се наоѓа во Халкидики, во северна Грција.
Посетата на патријархот Даниил на Света Гора продолжува во деновите од 21 до 24 октомври, а во нејзината програма е предвидено и учество на празнувањето на светите 26 Зографски маченици во манастирот Зограф.
