Најмалку седум лица загинале, а околу десет се повредени во вооружен напад што се случил на 23 октомври, кога погребна поворка си заминувала од православниот храм „Св. Георгиј“ во областа Карак, во Јордан. За нападот известува грчкиот црковен портал „Ортодоксија инфо“.
Според сведоштвата што ги пренесуваат локалните медиуми, двајца вооружени напаѓачи излегле од возило и почнале да пукаат во моментот кога присутните го напуштале храмот по погребот. Еден од напаѓачите, според наводите, бил вооружен со автоматска пушка АК-47.
Во моментот на нападот, повеќе од 150 луѓе се наоѓале во храмот и во неговата околина, изјавил очевидец за јорданска телевизиска станица. Според неговото сведоштво, неколку лица стоеле пред црквата непосредно пред да почне пукањето, кое, според локалните извештаи, траело неколку минути.
Дирекцијата за јавна безбедност на Јордан соопшти дека дел од повредените се во тешка состојба. Напаѓачите избегале од местото на настанот, по што безбедносните сили започнале операција за нивно пронаоѓање.
Портпаролот на јорданската влада, Мухамед ал-Мумани, преку социјалната мрежа Икс соопшти дека надлежните служби го истражуваат нападот. Засега не се разјаснети мотивите за пукањето.
Храмот се наоѓа во областа Карак, во јужниот дел на Јордан, регион во кој живее значајна христијанска заедница.
Нападот го осуди и Министерството за надворешни работи на Грција, кое преку објава на социјалните мрежи изрази сочувство до семејствата на загинатите и солидарност со народот на Јордан.
„Најостро го осудуваме грозоморниот терористички напад врз грчкиот православен храм „Свети Георгиј“ во Карак, Јордан. Изразуваме искрено сочувство до семејствата на жртвите, солидарност со јорданскиот народ и желби за брзо закрепнување на повредените“, се наведува во реакцијата на грчкото Министерство за надворешни работи.
