Католичката теологија мора да ги обединува интелектуалната строгост и сочувството, останувајќи вкоренета во заедништвото со Бога и посветена на заштитата на човечкото достоинство во услови на технолошки промени и општествени кризи. Ова го истакна кардиналот Мајкл Черни, префект емеритус на Дикастеријата за промовирање на интегралниот човечки развој, на конференција по повод стогодишнината на институцијата „Свети Георги“ во Франкфурт.
На конференцијата, одржана на 17 октомври 2026 година под наслов „Надвор од знаењето: Теолошко образование од грижа за човештвото“, Черни одржа предавање на тема „Величественото човештво и католичката теологија“, во кое ја разгледа одговорноста на теолошкото образование во современиот свет, повикувајќи се на учењето на папата Лав XIV и на неговиот претходник, папата Фрањо.
Осврнувајќи се на енцикликата Magnifica humanitas на папата Лав XIV, кардиналот ја постави грижата за човечката личност во ерата на вештачката интелигенција во поширокиот контекст на социјалното учење на Католичката црква.
Според Черни, од Индустриската револуција, преку Студената војна, климатските промени и пандемијата, социјалните енциклики на Црквата одговарале на различни историски околности, но со постојана определба за заштита на човечкото достоинство.
„Во секој историски момент контекстот може да биде многу различен, но мелодијата е иста: неприкосновеното достоинство на човечката личност“, истакна кардиналот.
Тој нагласи дека теолозите треба да ги препознаваат клучните предизвици на своето време, меѓу кои војните, миграцијата, уништувањето на животната средина, општествената поларизација и слабеењето на институциите.
Повикувајќи се на мотото на институцијата „Свети Георги“, Pietati et Scientiae, Черни истакна дека духовноста, верата и практичниот живот треба да го насочуваат академското истражување.
Теологијата, според него, е дар вкоренет во заедништвото со Бога и живеен во Црквата. Таа ја прима традицијата од претходните поколенија, ја толкува во светлината на современите околности и ја пренесува на идните генерации.
„Вистинското внимание неизбежно добива облик на сочувство“, рече Черни, повикувајќи ги теолозите да не останат на ниво на академско проучување, туку да бидат непосредно засегнати од современите облици на ропство, насилство и неправда.
Потсетувајќи на пораките на папата Фрањо, тој предупреди дека теологијата без сочувство ризикува да се затвори во привилегирана изолација, оддалечена од ризиците и страдањата со кои се соочува голем дел од човештвото.
Проповедањето на Евангелието, нагласи кардиналот, има и непосредна општествена димензија, која се изразува преку милосрдието и ангажманот за другите.
Черни повика на теолошко образование засновано врз духовното расудување и синодалноста, сфатена како култура на меѓусебна доверба, слушање и разбирање.
„Станува збор за промена во начинот на кој бискупите и верниците се однесуваат едни кон други и во начинот на кој се остварува вистинскиот авторитет“, истакна тој.
Според кардиналот, католичките теолошки факултети треба да бидат простори за критичко и заедничко размислување, кои ќе им помагаат на помесните Цркви да развиваат пасторални одговори на предизвиците на современиот свет.
Осврнувајќи се на апелот на папата Лав XIV до образовните заедници, Черни го заврши предавањето со повик: „Разоружувајте ги зборовите, подигнете го погледот и чувајте го срцето.“
