Московската патријаршија продолжува да ги зајакнува црковните врски со Антиохиската православна црква. На 24 јули во Одделот за надворешни црковни врски на Руската православна црква се одржа средба меѓу митрополитот Волоколамски Антониј и делегација на Антиохиската патријаршија, на која биле разгледани прашања поврзани со меѓуправославните односи, но и со заедничките хуманитарни активности.
Во Москва пристигнаа митрополитот Горноливански Силуан, митрополитот Захлејски и Баалбечки Антониј, како и архимандритот Јеремија (Азам) од Захлејската митрополија.
Средбата се одржа во период кога односите меѓу православните цркви се соочуваат со сериозни поделби, особено по прашањето за украинската црковна криза и признавањето на Православната црква на Украина. Антиохиската патријаршија досега не ја признава автокефалноста на ПЦУ, а во повеќе наврати повикуваше на дијалог меѓу православните цркви.
Според информациите од Московската патријаршија, на разговорите биле разгледани „актуелни прашања поврзани со меѓуправославните односи“, без дополнителни детали за конкретните теми. Двете страни разговарале и за заедничките хуманитарни проекти што ги реализираат Руската и Антиохиската црква.
Митрополитот Волоколамски Антониј при средбата потсети на своите посети на Либан, меѓу кои и на свеченостите по повод осветувањето на храмот посветен на иконата на Пресвета Богородица „Неочекувана радост“ во Захле во мај минатата година.
На средбата присуствувал и митрополитот Филипополски Нифон, претставник на патријархот Антиохиски и на целиот Исток при Московскиот патријарх.
Средбата доаѓа во време кога Москва настојува да ги одржи и зајакне односите со црквите од Блискиот Исток, регион во кој Руската православна црква има силно присуство преку хуманитарни и црковни активности.
