Владејачката партија „Прогресивна Бугарија“ поднесе предлог-закон со кој од учебната 2028/2029 година се предвидува воведување на нов задолжителен училишен предмет „Добродетели и религии“, форма на Веронаука. Предлогот во голема мера го следи моделот подготвен од поранешниот министер за образование Красимир В’лчев, но содржи неколку измени во однос на претходната верзија, објави бугарскиот портал Двери.бг.
Според законскиот предлог, учениците и нивните родители ќе можат да изберат една од трите наставни програми – „Религија – Православие“, „Религија – Ислам“ или неконфесионална програма, која ќе биде насочена кон добродетели, етика и граѓанско образование. Предметот ќе биде задолжителен, но учениците нема да добиваат оценки.
Во образложението на предлог-законот се наведува дека целта е преку систематско изучување на моралните вредности да се развијат личните, социјалните и граѓанските компетенции на учениците, без да се наруши секуларниот карактер на образовниот систем. Властите нагласуваат дека се гарантира слободата на избор меѓу понудените програми.
Една од најзначајните измени е тоа што воведувањето на предметот се одложува за една година – наместо во учебната 2027/2028, наставата треба да започне во учебната 2028/2029 година, најпрво за учениците од прво одделение, а потоа постепено да се проширува и во останатите одделенија. Одложувањето треба да овозможи подготовка на наставните програми, учебниците и обуката на наставниот кадар.
Предлогот предвидува и намалување на прагот за верските заедници што можат да понудат конфесионална програма од 10 на 8 проценти од населението, при што Источното православие изрично се издвојува како традиционална и призната вероисповед. Истовремено, изборниот предмет „Религија“ останува во наставната понуда и ќе може да се изучува паралелно со новиот задолжителен предмет.
Дополнително, ако во некое училиште нема доволен број ученици што ќе ја изберат неконфесионалната програма за формирање група, законскиот предлог овозможува организирање индивидуална настава за тие ученици.
Предлог-законот веќе е доставен на разгледување во парламентарните комисии за образование, човекови права и вероисповеди, како и за регионална политика. Доколку биде усвоен, предметот „Добродетели и религии“ ќе стане дел од задолжителната наставна програма во бугарските основни училишта од учебната 2028/2029 година.
