Светиот архијерејски синод на Македонската православна црква – Охридска архиепископија ја потврди посетата на Москва, за која „Религија.мк“ ексклузивно објави минатата недела. За официјални претставници на МПЦ-ОА во посетата на Руската православна црква се определени митрополитот Дебарско-кичевски Георгиј и секретарот на Синодот, епископот Хераклејски Климент.
Со ова, Синодот официјално го потврди составот на делегацијата што ќе отпатува во Москва, каде што на 20 ноември ќе се одбележи 80-тиот роденден на рускиот патријарх Кирил.
Особено внимание привлекува фактот што во делегацијата не е митрополитот Преспанско-пелагониски Петар, кој е претседател на Комисијата за надворешни работи на МПЦ-ОА.
Како што објави „Религија.мк“ на 21 октомври, станува збор за официјална црковна делегација, делегирана од архиепископот Стефан.
Минатата година, митрополитот Петар и епископот Никола престојуваа во Москва, но, според информациите со кои располагаше „Религија.мк“, тогашното патување било од приватен карактер, за разлика од претстојната посета, која е официјално одобрена од Синодот.
Ексклузивно: Двајца владици на МПЦ-ОА ќе патуваат во Москва на роденденот на Рускиот патријарх Кирил
Јубилејот на патријархот Кирил се одржува во период на сериозни несогласувања во православниот свет, особено околу украинското црковно прашање и односите меѓу Московската и Вселенската патријаршија. Во такви околности, составот на делегацијата и нивото на официјално претставување на МПЦ-ОА добиваат дополнително значење во односите со Москва.
