Романската патријаршија и романското Министерство за надворешни работи објавија заедничка хуманитарна иницијатива во вредност од 50.000 евра за поддршка на христијанската заедница во Појасот Газа, како и на други ранливи лица и заедници кои се соочуваат со тешки хуманитарни услови, објавија романските медиуми.
Проектот, официјално насловен „Пакет помош за христијаните во Газа“ (Gaza Christians Aid Package), ќе се спроведува од јуни до декември 2026 година. Тој е дел од пошироките и континуирани напори на Романија за помош на цивилното население погодено од хуманитарната криза во Газа.
Средствата, обезбедени од Романската патријаршија во духот на христијанската солидарност и општествената одговорност, ќе бидат искористени за набавка на храна, лекови и други неопходни производи за семејствата на кои им е потребна помош, со особено внимание кон децата.
Хуманитарната операција се координира со директна поддршка од Амбасадата на Романија во Тел Авив, која посредувала во воспоставувањето соработка со американската хуманитарна организација Samaritan’s Purse. Преку ова партнерство, финансиската помош ќе биде брзо претворена во директна хуманитарна поддршка и безбедно распределена до ранливото цивилно население на терен.
-Се очекува проектот да опфати околу 600 лица и е структуриран околу четири главни области на интервенција. Тие вклучуваат прехранбена помош преку подготовка и дистрибуција на околу 2.400 топли оброци, образовна поддршка преку обезбедување на 200 целосно опремени училишни ранци, медицинска помош што опфаќа основни лекови за хронични заболувања и хигиенски пакети за 200 ранливи лица, како и подобрен пристап до чиста вода преку набавка и распределба на десет големи резервоари за вода. Според организаторите, проектот ќе се реализира во строга согласност со меѓународните хуманитарни принципи, вклучително и непристрасност, недискриминација, заштита и безбедност на корисниците на помошта, пишуваат медиумите.
