Епископот на Епископалната црква на Њу Хемпшир, Роб Хиршфелд, привлече внимание во САД откако јавно ги повика свештениците од својата епархија да ги уредат своите лични и правни работи, вклучително и да ги финализираат тестаментите, подготвувајќи се за, како што рече, „нова ера на мачеништво“.
Изјавата беше дадена за време на бдение во спомен на Рене Гуд, која беше смртно застрелана на 7 јануари додека се наоѓала во својот автомобил, при инцидент со припадник на американската Служба за имиграција и царина. Настанот предизвика широка јавна дебата, откако федералните власти соопштија дека службеникот дејствувал во самоодбрана, тврдење кое беше оспорено од локални политички претставници и дел од јавноста врз основа на видео-снимки од настанот.
Во своето обраќање, епископот Хиршфелд потсети на примери од историјата кога христијански свештеници и верници ги ризикувале сопствените животи за да ги заштитат другите. Меѓу нив го спомена и семинаристот Џонатан Даниелс, кој во 1965 година бил убиен во Алабама додека штител млад активист за граѓански права. Тој истакна дека можеби доаѓа време кога сведоштвото на Црквата нема да се состои само од зборови и јавни изјави, туку и од конкретно застанување меѓу „силите на овој свет и најранливите“. Според него, ова не е повик на насилство, туку повик на духовна подготвеност и христијанска храброст. „Ако навистина сакаме да живееме без страв, не смееме да се плашиме ниту од самата смрт“, нагласи Хиршфелд, додавајќи дека христијанската вера подразбира подготвеност за жртва во служба на правдата и љубовта.
Слични пораки во последните недели упатија и други христијански лидери во САД, кои ги повикуваат верниците да ги заштитуваат имигрантите, бегалците и другите ранливи групи, во услови на заострени имиграциски политики. Во тие повици се истакнува дека одговорот на христијаните не треба да биде омраза или насилство, туку љубов, надеж и активна солидарност со оние кои страдаат.
