Вселенскиот патријарх Вартоломеј во вторникот, 21 јули, во седиштето на Вселенската патријаршија во Истанбул го прими Ерусалимскиот патријарх Теофил III, кој престојуваше во официјална посета на Фанар.
Според соопштението на Вселенската патријаршија, патријархот Теофил ја изразил желбата да го посети Фанар, одговарајќи и на претходните покани од патријархот Вартоломеј. При неговото пристигнување беше пречекан од свештенослужителите на Патријаршискиот двор, по што се поклони во Патријаршискиот храм „Свети Георгиј“ и се сретна со Вселенскиот патријарх.
Во присуство на архиереи и членови на двете делегации, а потоа и на приватна средба, двајцата поглавари разговарале за меѓуцрковни и други актуелни прашања од заемен интерес. Во официјалното соопштение особено се истакнува дека патријархот Вартоломеј ја изразил својата загриженост за состојбата на христијаните во Светата Земја и ја нагласил потребата од воспоставување мир на Блискиот Исток.
По разговорите, Вселенскиот патријарх приредил свечена вечера во чест на патријархот Теофил и неговата придружба.
Средба со пошироко црковно значење
Иако официјалното соопштение не открива детали од разговорите, посетата привлекува внимание поради односите меѓу двете древни патријаршии во последните години.
Ерусалимската патријаршија не ја призна автокефалноста на Православната црква на Украина и традиционално одржува блиски односи со Московската патријаршија. Во 2020 година, токму патријархот Теофил беше домаќин на средбата во Аман, иницијатива што Москва ја поддржа, а која Вселенската патријаршија ја оцени како паралелен процес надвор од воспоставениот православен поредок.
Поради тоа, средбата во Фанар се оценува како важен сигнал дека, и покрај различните ставови околу украинското црковно прашање, Вселенската и Ерусалимската патријаршија ги одржуваат меѓусебните контакти и продолжуваат со дијалогот.
Иако нема официјална потврда дека украинското прашање било тема на разговор, дипломатската формулација во соопштението дека се разговарало за „меѓуцрковни и други актуелни прашања од заемен интерес“ остава простор за проценка дека меѓу темите можеле да бидат и актуелните предизвици со кои се соочува православниот свет, покрај состојбата на христијаните во Светата Земја и конфликтите на Блискиот Исток.
