Новата учебна година во Австрија започна со примена на новата законска забрана со која на ученички помлади од 14 години им е забрането да носат марама што ја покрива главата според исламските традиции. Мерката важи и во државните и во приватните училишта.
Забраната е дел од измените на австрискиот Закон за образование и стапи во сила на 1 септември 2026 година, со почетокот на учебната 2026/27 година. Таа важи за ученички до нивниот 14. роденден и се однесува на училишните објекти и училишниот простор. Не ги опфаќа наставата и училишните активности што се одржуваат надвор од училиштето.
Според австриските власти, целта на мерката е да се заштитат самостојноста, еднаквоста и слободниот развој на девојчињата. Министерката за интеграција и култус Клаудија Бауер од Народната партија (ÖVP) го опиша детскиот хиџаб како „знак на потчинетост“ и средство за контрола на девојчињата уште од најрана возраст.
Законот беше усвоен во декември 2025 година од владејачките ÖVP, SPÖ и NEOS, а за него гласаа и пратениците на десничарската Слободарска партија (FPÖ). Зелените беа против, оценувајќи дека мерката ги дискриминира муслиманските девојчиња и може да биде спротивна на Конвенцијата за правата на детето.
Законот предвидува постепена постапка. При прв прекршок, раководството на училиштето треба да разговара со ученичката и нејзините родители или старатели. При повторување, се вклучува надлежната образовна управа, а при ново прекршување може да биде известена и службата за заштита на децата.
Како последна мерка, за родителите или старателите се предвидува глоба од 150 до 800 евра, а во случај глобата да не може да се наплати, законот предвидува и можност за замена со затворска казна до две недели.
Муслиманската заедница најавува правна битка
На законот остро се спротивставува Исламската верска заедница во Австрија (IGGÖ), која смета дека забраната претставува неоправдано ограничување на верската слобода и принципот на верска и светогледна неутралност на државата.
IGGÖ веќе има нарачано правно мислење според кое новата регулатива е спротивна на австрискиот Устав. Организацијата најави дека ќе бара преиспитување на законот пред Уставниот суд на Австрија и обезбедува правна и советодавна поддршка за семејствата кои сакаат да го оспорат.
