Патријархот на Српската православна црква, Порфириј, упати честитка до патријархот на Романската православна црква, Даниел, по повод неговиот 75. роденден, посакувајќи му здравје, долговечност и успешна служба за доброто на Православната црква.
Во честитката, Порфириј му посакува на Даниел Бог да му подари добро здравје, мир и духовна сила, како и неговата патријаршиска служба да продолжи да биде од полза за Православната црква и за зачувување на нејзиниот канонски поредок.
„Нека добриот Бог, по чија промисла дојдовте на овој свет и чија рака Ве постави на чело на Романската патријаршија, Ве дарува во мир, здравје, чест и долговечност, како оној што правилно раководи со словото на Неговата вистина“, се наведува во честитката.
Патријархот Даниел е роден на 22 јули 1951 година во селото Добрешти, во округот Тимиш. По богословските студии во Букурешт, докторирал на Универзитетот во Стразбур, а дел од своето научно усовршување го поминал во Германија.
За патријарх на Романската православна црква беше избран на 12 септември 2007 година, а устоличен на 30 септември истата година.
Во текот на неговото речиси две децениско служење, Романската православна црква значително ја прошири својата хуманитарна и социјална дејност и денес управува со повеќе од 800 хуманитарни институции. Во неговиот мандат беа канонизирани повеќе од 40 романски светители, а особено внимание беше посветено и на духовната грижа за романската дијаспора.
Еден од најзначајните проекти реализирани во времето на патријархот Даниел е изградбата на Националната катедрала во Букурешт, која денес претставува еден од најголемите православни храмови во Европа.
