Православните христијани не треба да се водат од национализмот, политичките определби и шовинизмот, туку од заедничката вера, порача бугарскиот патријарх Даниил на одбележувањето на празникот на светиот српски крал Милутин во Софија.
Даниил на 30 октомври служеше литургија во храмот „Света Недела“, каде што се чуваат моштите на средновековниот српски владетел. Во сослужувањето учествуваа архијереи и свештеници од Бугарската и Српската православна црква.
Осврнувајќи се на животот на свети Милутин, патријархот ги истакна неговата грижа за Црквата и милосрдието, потсетувајќи дека изградил или обновил околу 40 цркви и помагал на црковни и хуманитарни установи во Ерусалим и Цариград.
„Како православни христијани, не треба да се водиме од националноста, политичките определби, националистичките чувства или шовинизмот, туку од нашата православна вера“, порача Даниил.
Тој повика на надминување на поделбите и зачувување на црковното единство, љубовта и братството.
По литургијата, моштите на свети Милутин беа носени во литија околу храмот. На прославата присуствуваше и делегација на Српската православна црква, а митрополитот Иларион пренесе поздрави од српскиот патријарх Порфириј.
