Руски брачен пар е приведен во Истанбул откако наводно читал Библија во Света Софија, која денес функционира како џамија.
Според рускиот медиум „Осторожно Новости“, 32-годишниот Игор и неговата сопруга Викторија допатувале од Москва на одмор и ја посетиле историската Света Софија. Игор тврди дека откако извадил Библија и почнал да чита од неа, полициски службеници го опколиле брачниот пар, ги извеле од објектот и ги однеле во полициската станица во општината Фатих.
Според неговите тврдења, двајцата биле задржани одвоено неколку часа, а за време на притворот не им била обезбедена храна.
Потоа биле префрлени во центар за задржување на мигранти во општината Арнавутќој во Истанбул, каде што и понатаму се наоѓаат додека траат административните постапки.
Според турското законодавство, административното задржување на странски државјани не може да трае повеќе од шест месеци, но рокот може да биде продолжен за уште шест месеци доколку депортацијата не може да се спроведе поради недостиг на документација или поради несоработка од страна на задржаното лице.
Случајот го следи Генералниот конзулат на Русија во Истанбул. Од Руската амбасада во Турција соопштија дека дипломатските претставници се во редовен контакт со адвокатот на брачниот пар и внимателно го следат развојот на настаните.
Според истите информации, двајцата руски државјани се осомничени за прекршување на член 216 од Турскиот кривичен законик, кој се однесува на кривичното дело „поттикнување омраза“.
