Во периодот од 6 до 9 јули 2026 година два стручни тима од Националниот конзерваторски центар ги реализираат конзерваторските истражувања во црквата Св. Ѓорѓи во Полошкиот манастир со цел изработка на проектите за конзервација и реставрација на архитектурата и на ѕидното сликарство на едно од најзначајните недвижни културни добра во Македонија.
Сместен на брегот од Тиквешкото Езеро и достапен исклучиво по воден пат, Полошкиот манастир претставува редок спој на природна убавина, духовност и вековна историја.
Раководител на проектот за архитектурата: м-р Цветанка Хаџи Пецова, дипл. инж.арх. – советник конзерватор.
Раководител на проектот за ѕидното сликарство: д-р Јехона Спахиу Јанчевска, историчар на уметноста – советник конзерватор.
Во истражувањата учествуваат и м-р Владо Муковски, сликар – советник конзерватор, д-р Лидија Робева Чуковска, дипл. хем. инж. – конзерватор советник, д-р Мишко Тутковски, историчар на уметноста – советник документатор, м-р Луиза Невзати, дипл. инж. арх. – виш конзерватор, Орхан Османи, графичар – конзерватор и проф. д-р Сергеј Чурилов, градежен инженер, обединувајќи различни стручни и научни профили во заедничка мисија, а тоа се проучувањето, конзерваторските истражувања и заштитата на ова исклучително значајно културно добро.
Особено значајно е што сегашните истражувања претставуваат продолжение на процес започнат пред повеќе од една деценија. Уште во 2013 година д-р Јехона Спахиу Јанчевска ја подготви апликацијата за номинација на Полошкиот манастир за World Monuments Fund (WMF), со што беше вклучен во меѓународната листа World Monuments Watch (WMW) за 2014 година.
