Верници во храмот „Св. пророк Илија“ на Антиохиската православна црква во Еленсбург, сојузната држава Вашингтон, спречија можен трагичен инцидент откако маж внел пиштол во црквата за време на богослужба.
Според полициските информации, 27-годишниот Александар Зијад Милер од Мозес Лејк влегол во храмот додека околу 50 верници присуствувале на службата. Црковните посетители, меѓу кои имало и полицаец кој не бил на должност и пензиониран полициски службеник, реагирале откако сопругата на Милер наводно се заканила дека ќе пука во луѓето во црквата.
Подоцна полицијата во автомобилот на Милер, паркиран пред храмот, пронашла целосно автоматска пушка AR-15 и десетици куршуми. „Ако не беа пензионираниот полицаец и полицаецот кој не беше на должност, денес можевме да имаме сосема поинаков исход. Бевме многу блиску до масовно пукање“, изјави заменик-обвинителот Роберт Портер пред судијата Крис Херион.
Според обвинителството, свештеник кој два дена претходно го посетил домот на двојката за да прочита молитва забележал однесување што предизвикало загриженост. Кога подоцна пристигнале во храмот, сопругата на Милер изјавила дека имала намера да пука во луѓето таму.
Пензионираниот полициски службеник забележал дека жената се однесувала нестабилно и најверојатно се наоѓала во психичка криза. Таа почнала забрзано да се крсти и да упатува сериозни закани. Полицаецот, кој носел скриен пиштол, интервенирал и ја спречил ситуацијата да ескалира. Кај Милер бил пронајден пиштол „Глок“ калибар 9 мм и мала количина муниција.
Според полициската изјава, жената им кажала на службениците дека има психички здравствени проблеми и дека не ги земала своите лекарства. Таа изјавила дека верува дека демони често го контролираат нејзиното однесување и дека владините структури го користат нејзиното тело за различни операции. Подоцна била пренесена во болницата Kittitas Valley Healthcare за психијатриска проценка.
По првото судско рочиште, Милер бил задржан во притвор со кауција од еден милион долари и моментално се наоѓа во окружниот затвор во Китиџас.
