Во ноќта меѓу 24 и 25 јануари, непознати сторители извршија тешка кражба во скитот на Светогорската лавра – под јурисдикција на Украинската православна црква-Московска патријаршија, посветен на иконата на Богородица „Радост на сите ожалостени“, кој се наоѓа во селото Богородично, во Доњецката област
Кражбата била откриена утрото на 25 јануари, кога чуварот забележал дека влезната порта е отворена, а синџирите на катанецот пресечени со алат. Вратите на долниот и горниот параклис биле насилно скршени. Во близина на храмот биле забележани траги од товарно возило и бројни стапки, што укажува дека станува збор за организирана група.
Од камбанаријата биле украдени осум од вкупно десет камбани. Од најголемата камбана, тешка околу 1,4 тони, бил отстранет јазикот, додека втората по големина била фрлена на подот и оштетена.
Во долниот параклис биле однесени четири свеќници. Провалниците влегле и во олтарниот простор, од каде што зеле две богослужбени евангелија, кандилници, свеќници, седмокракиот свеќник, крст од жртвеникот и метален аналогиј. Останатите предмети биле расфрлани, а дел од кандилниците скршени. Била отворена и црковната каса за прилози.
Случајот дополнително ја продлабочува загриженоста за безбедноста на црковните објекти во регионот, особено имајќи предвид дека Светогорската лавра и нејзините подворја со години функционираат во услови на воен конфликт. За настанот се очекува да се изјаснат надлежните институции.
