Ватиканското мозаично студио ја заврши изработката на мозаичниот портрет на папата Лав XIV, наменет за базиликата „Свети Павле надвор од ѕидините“, соопшти Канцеларијата за печат на Светиот Престол.
Во согласност со древната традиција што го следи изборот на секој папа, нешто повеќе од осум месеци по изборот на папата Лав XIV, студиото го изработи мозаичниот медалјон по барање на архипрезвитерот на базиликата, кардинал Џејмс Мајкл Харви. Делото му беше претставено на папата пред неговата редовна Генерална аудиенција во Ватикан.
Мозаикот, со дијаметар од 137 сантиметри, е изработен од стаклен емајл и злато, поставени на метална конструкција, во работилниците на Фабриката на Свети Петар. Поединечните мозаични парчиња се изработени со древната техника на сечен мозаик и се поставени со традиционален маслен кит, карактеристичен за ватиканската мозаична школа. Изработката се темели на подготвителен сликан цртеж од мајсторот Родолфо Папа – масло на платно со исти димензии како и мозаикот – специјално создаден за да биде пренесен во мозаична техника.
Мозаичниот портрет ќе биде поставен во десниот коридор на базиликата, веднаш до портретот на папата Франциск, на височина од околу 13 метри.
Сликаниот подготвителен цртеж, пак, ќе биде зачуван во Фабриката на Свети Петар во Ватикан, заедно со целата збирка портрети на римските понтифи.
