Свештеници и претставници на Српската православна црква предупредуваат дека најавената примена на т.н. „закон за странци“ на Косово може да предизвика сериозни последици за српската заедница и за институциите на Црквата во покраината.
Според најавите, законот треба да почне да се применува од 15 март. Со него за странци ќе се сметаат сите државјани на Србија кои не се родени на територијата на Косово или кои немале пријавено живеалиште таму до 10 јуни 1999 година.
Протојереј-ставрофор Велибор Џомиќ изјави дека ваквата регулатива може да доведе до сериозни ограничувања за српското население кое со векови живее на Косово и Метохија. „Кога на српскиот патријарх, чија куќа и историско седиште е во Пеќката патријаршија, му се забранува влез на таков начин, јасно е каква порака се испраќа до народот што таму живее и за кој тој е духовен отец“, рече Џомиќ.
Тој потсети дека на патријархот Порфириј пред две години му бил забранет влез на Косово, што, според него, испратило порака дека и посетите на верници и свештени лица во покраината можат да станат проблематични.
Според Џомиќ, новите правила би можеле да доведат до низа практични проблеми за луѓето кои се поврзани со Косово поради работа, образование или црковна служба. Тој предупреди дека примената на законот може да влијае и врз функционирањето на манастирите и парохиите на Српската православна црква, бидејќи локалната администрација ќе има дискреционо право да одлучува за одобрување престој.
На можните последици неодамна реагираше и Епархијата рашко-призренска, која предупреди дека ригидната и брза примена на правилата без јасен преоден период може да доведе до сериозни проблеми за голем број луѓе.
Од епархијата повикаа надлежните институции да покажат одговорност и преку дијалог да се најдат практични решенија, со цел да се избегне било каква примена на прописите што би имала негативни или дискриминаторски последици за српската заедница на Косово.
