Заводот за заштита на спомениците во Краљево наложил враќање на првобитниот изглед на црквата „Света Троица“ во Горњи Милановац, откако биле утврдени градежни интервенции без потребните одобренија.
Црквата „Света Троица“ во српскиот град Горњи Милановац претрпела недозволени интервенции со поставување клима-уреди и ПВЦ врати, иако станува збор за објект прогласен за споменик на културата од големо значење. За случајот известува белградската телевизија Н1, повикувајќи се на Заводот за заштита на спомениците на културата во Краљево.
По пријави од граѓани, надлежната установа извршила теренска контрола и утврдила дека за поставувањето на системот за климатизација и застаклените ПВЦ врати на северниот и јужниот влез не биле поднесени барања, ниту биле издадени услови за спроведување мерки за техничка заштита. Не била дадена ниту согласност за проектната документација.
„Начинот на изведување на наведените работи не е во согласност со конзерваторските принципи за зачувување на изворниот материјал и архитектонските, ликовните и споменичките вредности на објектот“, соопштиле од Заводот за Н1.
Според Кристина Милошевиќ од здружението „Млади Милановца“, при контролата било утврдено дека е пробиена камената фасада за поставување на клима-уредите, дека иконостасот не бил изработен според условите издадени од Заводот, како и дека биле вградени ПВЦ врати за кои немало одобрение.
Црквата е изградена во 1862 година, а во 1966 година била прогласена за споменик на културата. Во 2000 година добила статус на недвижно културно добро од големо значење.
Милошевиќ за Н1 изјавила дека од општинскиот буџет за живописувањето на црквата и изработката на иконостасот биле издвоени најмалку 10,5 милиони динари. Оттука, се отвора и прашањето дали поставувањето на клима-уредите и ПВЦ вратите било финансирано со јавни средства, како и кој ќе ги покрие трошоците за нивно отстранување и за санација на објектот.
Од Заводот за заштита на спомениците на културата во Краљево најавиле дека ќе поведат постапка и ќе донесат соодветен акт по утврдените неправилности. Според нив, враќањето на црквата во првобитната состојба е можно во најголема мера, што подразбира отстранување на ПВЦ вратите и клима-уредите.
Иако од Жичката епархија не одговориле на прашањата на Н1, по извршената контрола Црковната општина во Горњи Милановац побарала од Заводот да изработи решение за греење и ладење на храмот.
Засега не е соопштено дали и какви санкции ќе бидат изречени за изведувањето на работите без потребните одобренија.
Случајот го отвора прашањето за одговорноста на црковните управи при интервенции во храмови што имаат статус на заштитено културно наследство, особено кога градежните зафати можат да ги нарушат автентичноста на објектот и зачуваното црковно сликарство.
