Речиси секој храм на Руската православна црква на окупираниот Крим рекламира можност за испраќање деца на „активен одмор со духовен развој“, се наведува во репортажа на интернет-изданието Cemaat, а пренесено од hristianstvo.bg.
Според текстот, главната порака што се пренесува во овие кампови е дека жртвувањето на животот за Русија не треба да се смета за нешто страшно, туку за достоинствен чин.
Наместо дискотеки, на децата им се нудат народни танци, наместо плажа – молитва, а наместо мобилни телефони – часови по свирење балалајка. Станува збор за таканаречени „православни воено-патриотски кампови“, кои првпат биле отворени на полуостровот во 2023 година и оттогаш нивната мрежа брзо се шири.
Еден од организаторите е Илија Костров, раководител на организацијата „Рекрут“, која дејствува во Московската област од 2015 година. Според извештајот, ова лето организацијата ќе ги пренесе своите „православни воено-патриотски вредности“ и на Крим.
Секојдневната програма во камповите вклучува утрински и вечерни молитви, обука за боречки вештини, стрелачки вежби, составување и расклопување автоматско оружје, свирење народни инструменти, како и учество во традиционални руски народни танци. На децата им се одземаат мобилните телефони и им се дозволува краток контакт со родителите само во вечерните часови.
Според репортажата, Костров во интервјуа за руски медиуми тврдел дека доброволно учествувал во војната во Украина, без притоа да открие дополнителни детали.
Во организирањето на ваквите активности учествуваат и други групи од Москва. Меѓу нив е и „Братството на православните водичи“, организација поврзана со Руската православна црква, која е активна на Крим од 2023 година.
Програмите што им се нудат на децата вклучуваат средби со учесници во таканаречената „специјална воена операција“, обуки поврзани со диверзантски активности, симулации на борбени дејства и верски активности.
Според авторите на репортажата, речиси секоја руска православна црква на Крим денес активно ги промовира овие кампови како можност за „активен одмор со духовен развој“, при што во нивната програма се испреплетуваат верски содржини, патриотско воспитување и елементи на воена подготовка.
