Со свечено богослужение во катедралата „Успение на Пресвета Богородица“ во градот Володимир, Волинска област, поглаварот на Православната црква на Украина, митрополитот Киевски Епифаниј, го означи почетокот на, како што истакна, „нова духовна страница“ за земјата – страница на ослободување и духовно обновување.
За првпат во оваа историска катедрала служеа епископи и свештеници на Православната црква на Украина, откако храмот, кој со децении бил под управа на Москва, премина под административна надлежност на ПЦУ. Катедралата беше вратена во државна сопственост со судска одлука во октомври 2025 година, а во јануари 2026 година официјално ѝ беше доделена на ПЦУ за користење.
Во своето слово, митрополитот Епифаниј нагласи дека и покрај зимските услови, богослужението било исполнето со духовна топлина, единство и надеж. Во храмот за првпат одекна заедничка молитва на украински јазик, со учество на свештенството, верниците, бранителите на Украина и претставници на локалната власт.
Тој ја опиша катедралата како симбол на историјата на Волин и на украинската Црква, потсетувајќи дека таа, како и украинскиот народ, повеќепати била рушена и обновувана. Според него, со ова богослужение се воспоставува историска правда.
Митрополитот Епифаниј остро се осврна и на концептот на т.н. „руски свет“, за кој рече дека под изговор на „света војна“ оправдува насилство, уништување и геноцид. Тој потсети дека повеќе од 650 храмови и верски објекти во Украина се уништени од руската армија, вклучително и светињи во Киев и Одеса.
Во обраќањето, тој ги повика Украинците кои сѐ уште духовно се колебаат и гледаат кон Москва да се ослободат од стравот и зависноста, нагласувајќи дека вистината е таа што носи слобода.
На крајот од богослужението, митрополитот упати благодарност до украинските бранители и до сите кои придонеле молитвата повторно да се слуша на мајчиниот јазик во древната светиња, изразувајќи уверување дека вистината и Бог се на страната на Украина.
